Ecce dies gloriosa dies mundo gratiosa qua sorores matris dei meruerunt sursum vehi deum orent propitium pro salute fidelium

Jubilemus in hac die dignis deo laudibus qui claris virtutibus regnum dat sororibus matris virginis Mariae

Gratuletur civium coetus supernorum festivans sollemnia sacrarum sororum

Hodie celebritas datur toti mundo exsultemus igitur pectore jucundo

Almae matris nomine vocatae sorores sanctitate nominis pollent gratiores

Sollemnitas beatarum matris Christi germanarum celebratur hodie quas invitat ad superna Christus luce sempiterna fruituras gloriae alleluia

Felicium par sororum chorus gaudet supernorum

Ante regis solium astat purpurata per duarum puellarum fulta ministerium Esther delicata alleluia

Hae puellae duae flores matris dei sunt sorores

Hodie Mariae Jacobi et Mariae Salome sollemnitas celebratur quarum societate caelum gloriatur quarum patrociniis terra laetatur quarum gloriosis meritis ecclesia coronatur alleluia

Ad earum igitur memoriam totis viribus percurramus ut ipsarum consortes effici valeamus

Gloria patri et filio et spiritui sancto

Maria de Joachim fuit primogenita quae domini postea mater fuit inclyta

Maria Jacobi minoris est mater cujus fuit Cleophas homo justus pater

Maria Salome proles erudita paterno sic nomine fuit insignita

Maria Magdalene duaeque sorores emerunt aromata mysticos odores cupientes stigmatum ungere livores alleluia

Et dicunt ad invicem quis revolvet silicem ad sepulcri fores

Mirandae propagines tres ex una vite generantur procreantur ex quibus sex homines et creator vitae alleluia

Sic ex Anna tres puellae omnes dictae maris stellae

Super throno Salomonis sedile componitur sub quo firmae stationis duplex manus sculpitur bracchiis formatis quod in hora passionis Christi factum noscitur alleluia

Virgo mater pietatis sororibus amplexatis duabus innititur

Maria primogenita Joseph desponsata sine viri semine fuit fecundata

Maria mater Jacobi minoris Alphaeo sed Maria Salome datur Zebedaeo

Cum hac ergo Jacobus major fuit natus et alter discipulus deo plus amatus

O Jesu deificae lucis instrumentum olivae fructiferae dulce condimentum quem duae materterae mane quaerunt ungere portantes unguentum alleluia

Hae super candelabrum duae sunt olivae post crucis ventilabrum testes carnis vivae

Orto solis radio mulieres visio clara consolatur angelus terribilis veste delectabilis amoto signaculo reserato tumulo eas sic affatur alleluia

Non est hic quem quaeritis sed prout videbitis surgens gloriatur

Gaudeamus hodie immensae laetitiae laudes extollantur dum reginae gloriosae sorores egregiae Annae duae filiae caelo coronatur alleluia

Felices materterae sorores christiferae cum virtutum munere ad nos applicantur

Gloria*

Cum Maria Magdalenae sorores venerunt et unguentum fide plenae mane portaverunt

Ad sepulcrum domini sociae beatae corruscante veniunt solis claritate

Hae cum aromatibus intrant monumentum ubi corpus domini non fuit inventum

Et intrantes Juvenem splendidum sedere vident stola candidum et obstupuerunt

Quis revolvet lapidem ab ostio quaerunt revolutum lapidem jam cito viderunt

Mulieres angelus leniter affatur et ultra ne paveant blande consolatur dicens Jesum quaeritis credentes hunc mortuum jam surrexit non est hic ecce locum vacuum alleluia

Te deum laudamus*

Orate pro nobis beatae materterae Christi R. Ut digni

Maria Jacobi et Salome emerunt aromata alleluia

Ut venientes ungerent Jesum alleluia

Et respicientes viderunt revolutum lapidem alleluia alleluia

Erat quippe magnus valde alleluia

Hae cum aromatibus intrant monumentum

Ubi corpus domini non fuit inventum

Jesum quaeritis crucifixum R. Surrexit non est hic

Gaudeamus*

O lux luce clarior gemina lucerna caeteris splendidior dies hodierna qua sorores strenuae scandunt ad superna gaudentes assidue luce sempiterna alleluia