Qui habitat in adiutorio altissimi

Qui habitat in adiutorio altissimi in protectione dei caeli commorabitur V. Dicet domino susceptor meus et refugium meum deus meus sperabo in eum V. Quoniam ipse liberavit me de laqueo venantium et a verbo aspero V. Scapulis suis obumbrabit et sub pennis ejus sperabis V. Scuto circumdabit te veritas ejus non timebis a timore nocturno V. A sagitta volante per diem a negotio perambulante in tenebris a ruina et demonio meridiano V. Cadent a latere tuo mille et decem milia a dextris tuis tibi autem non appropinquabit V. Quoniam angelis suis mandavit de te ut custodiant te in omnibus viis tuis V. In manibus portabunt te ne umquam offendas ad lapidem tuum V. Super aspidem et basiliscum ambulabis et conculcabis leonem et draconem V. Quoniam in me speravit liberabo eum protegam eum quoniam cognovit nomen meum V. Invocavit me et ego exaudiam eum cum ipso sum in tribulatione V. Eripiam eum et glorificabo eum longitudinem dierum adimplebo eum et ostendam illi salutare meum